HÖKUMƏTLƏ VƏTƏNDAŞ CƏMİYYƏTİ ÜZVLƏRİ “Rəsmiləşdirilə bilinməyən daşınmaz əmlakın dövlət qeydiyyatı ” müzakirə ediblər

Posted on by

image“Şəffaflıq Azərbaycan” Korrupsiyaya Qarşı Mübarizə İctimai Birliyi, Amerika Birləşmiş Ştatları Beynəlxalq İnkişaf Agentliyinin (USAİD) dəstəyi “Rəsmiləşdirilə bilinməyən daşınmaz əmlakın dövlət qeydiyyatı ” mövzusunda dəyirmi masa keçirib. Tədbir Azərbaycan Şəffaflıq Tərəfdaşlığı (AŞT) layihəsi çərçivəsində hökumət qurumları ilə qeyri-hökumət təşkilatları arasında şəffaflığın və hesabatlılığın artırılması məqsədilə keçirilən silsilə tədbirlərin davamıdır.
AR Əmlak Məsələləri Dövlət Komitəsi, AR İqtisadiyyat Nazirliyi, AR Baş Prokuroru yanında Korrupsiyaya qarşı Mübarizə Baş İdarəsi, AR Vergilər Nazirliyi,  Binəqədi rayon İcra Hakimiyyəti və digər dövlət orqanları əməkdaşlarının, həmçinin, bələdiyyə və müxtəlif kommunal sahə ilə əlaqədar qurumların və vətəndaş cəmiyyəti nümayəndələrinin iştirak etdiyi dəyirmi masanın açılışını “Şəffaflıq Azərbaycan” təşkilatının icraçı direktoru Rəna Səfərəliyeva edib. O, daşınmaz əmlakın qeydiyyatı sahəsində özbaşına tikintilərin sayının artmasının ölkə daxilində böyük sosial problemə çevrilməsinə doğru irəlilədiyini vurğulayıb. Səfərəliyeva  dövlət orqanları tərəfindən bu problemin tez bir zamanda  həll edilməsi üçün bir sıra  tədbirlərin görülməsinin vacibliyini qeyd edib.
Tədbirdə çıxış edən AR ƏMDK yanında Daşınmaz Əmlakın Dövlət Reyestri Xidmətinin rəis müavini Elşad Məmmədov daşınmaz əmlakın qeydiyyatı zamanı tətbiq olunan mövcud qanunvericiliyin müddəaları barədə məlumat verdikdən sonra iştirakçıların suallarını cavablandırıb.
Tədbirin davamında “Şəffaflıq Azərbaycan» Korrupsiyaya Qarşı Mübarizə İctimai Birliyinin ekspert hüquqşünası Hafiz Həsənov daşınmaz əmlakın qeydiyyatdan keçirilməməsi nəticəsində yaranan hüquqi və sosial problemləri, həmçinin, vətəndaşların üzləşdiyi çətinlikləri tədbir iştirakçılarına, o cümlədən müvafiq dövlət qurumlarına çatdırıb.
Hafiz Həsənov problemin həlli üçün qeydiyyatdan keçə bilməyən evlərin müvafiq siyahısının hazırlanması, həmin evlərin qeydiyyat məsələlərinə baxan xüsusi komissiyanın yaranması, AR Mülki Məcəllənin 178.5 və 178.6 –cı maddələri nəzərə alınaraq komissiyanın fəaliyyətinin təşkili,  qanunvericilik bazanın təkmilləşdirilməsi kimi bir sıra tövsiyələri təqdim edərək, bu tövsiyələrin təşkilat tərəfindən  xüsusilə qeydiyyatdan keçə bilməyən daşınmaz əmlakın qeydiyyatı ilə bağlı problemin həll olunması üçün hazırlandığını əlavə edib.
Qeyd edilənlərlə əlaqədar olaraq ŞA tərəfindən hazırlanmış olan tövsiyələr paketi iştirakçıların rəyləri nəzərə alınmaqla müvafiq dövlət qurumlarına təqdim edilib.

Related posts: