“Şəffaflıq Azərbaycan” Korrupsiyaya Qarşı Mübarizə İctimai Birliyinin eksperti və icraçı direktoru Rəna Səfərəliyeva “ASAN xidmət” mərkəzlərində rəhbər tutulan fəaliyyət prinsipləri və şəffaflıq standartlarının dövlət orqanlarında tətbiqini monitorinq edərək qiymətləndirmişdir.
Monitorinq hesabatı iyulun 14-də Avrasiya Əməkdaşlıq Fondunun maliyyə dəstəyi ilə Hökumət-Vətəndaş Cəmiyyəti Dialoqu Platformasının təşkil etdiyi dəyirmi masada təqdim edilmişdir. Təqdimat – Platforma tərəfindən həyata keçirilən “Açıq hökumətin təşviqinə dair 2016-2018-ci illər üçün Milli Fəaliyyət Planı”nın monitorinqinin nəticələrinin təqdim edildiyi silsiləvi tədbirlərdən biridir.
Milli Fəaliyyət Planının 8.6-cı bəndinə əsasən, hökumət “ASAN xidmət” mərkəzlərində rəhbər tutulan fəaliyyət prinsipləri və şəffaflıq standartlarının dövlət orqanlarında tətbiqi ilə bağlı tədbirlərin həyata keçirilməsini təşkil etməlidir. Monitorinq pilot layihə kimi nəzərdə tutulmuşdur və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi tərəfindən keçiriləcək daha geniş qiymətləndirmə üçün hazırlıq mərhələsi sayılır.
Sözügedən istiqamətin qiymətləndirilməsi məqsədilə “Şəffaflıq Azərbaycan” Korrupsiyaya Qarşı Mübarizə İctimai Birliyinin eksperti və icraçı direktoru Rəna Səfərəliyeva monitorinqi həyata keçirmişdir. Monitorinqin məqsədi dövlət qurumlarının xidmət mərkəzlərində ASAN xidmətin fəaliyyət prinsiplərinin tətbiqi ilə bağlı real vəziyyəti öyrənmək və xidmət mərkəzlərinin fəaliyyətinin daha da yaxşılaşdırılması üçün tövsiyələr verməkdir.
Monitorinq çərçivəsində 9 dövlət qurumuna məxsus 9 xidmət mərkəzinin fəaliyyəti qiymətləndirilmişdir. Qiymətləndirmə “ASAN xidmət” mərkəzlərində rəhbər tutulan fəaliyyət prinsipləri və şəffaflıq standartları — şəffaflıq, rahatlıq, operativlik, nəzakətlilik, məsuliyyət və vətəndaş məmnuniyyəti meyarları əsasında aparılmışdır.
Monitorinqin nəticələri göstərmişdir ki, xidmət mərkəzlərinin ən yaxşı nəticə göstərdiyi meyarlar nəzakətlilik, məsuliyyət və operativlik meyarları üzrə olmuşdur. Rahatlıq və şəffaflıq meyarları üzrə nəticələrin səviyyəsi orta kimi qiymətləndirilmişdir. Vətəndaş məmnuniyyəti meyarı ilə bağlı nəticələr aşağı olmuşdur. Buradan belə nəticə çıxarmaq mümkündür ki, xidmət mərkəzləri şəffaflığı və rahatlığı təmin edən mexanizmləri təmin etməli və ən əsası vətəndaş məmnuniyyətini öyrənən mexanizmlər tətbiq etməlidirlər.
Aşağıdakı diaqramda müvafiq meyarlar üzrə ümumi nəticələr əks olunmuşdur (0 ən aşağı, 100 isə ən yuxarı nəticəni ifadə edir).
Hesabatla buradan tanış ola bilərsiniz.
Daha ətraflı məlumat üçün “Şəffaflıq Azərbaycan” Korrupsiyaya Qarşı Mübarizə İctimai Birliyinin eksperti və icraçı direktoru Rəna Səfərəliyeva ilə rena@transparency.az ünvanına yazmaqla və ya 596 20 38 / 497 68 15 nömrələrinə zəng etməklə əlaqə saxlaya bilərsiniz.
Monitorinq və tədbir Niderland Xarici İşlər Nazirliyinin maliyyə dəstəyi ilə Avrasiya Əməkdaşlıq fondu tərəfindən icra edilən “Azərbaycanda İnsan Haqları, Demokratikləşmə və Yaxşı İdarəetmənin Təşviqi” proqramı çərçivəsində keçirilib.